Марий Эл Радио

Республикысе театр-влак районлаш лектыт. Тӱвыра, печать да калык-влакын пашашт шотышто министерствын «Большая Афиша» проект дене Г.Константинов лӱмеш руш драме театр Волжскыш гастроль дене миен. Тушто йоча-влаклан «Клёпа+Лёля» йоча спектакльым, «Онегин» постановкым да «Семейный портрет с посторонним» комедийым темлен. «Большая Афиша» маршрутын вес остановкыжо Морко поселкышто. Тушто 18 мартыште йоча, школышто тунемше да кугурак ийготан-влаклан спектакльым ончыктат. Тиде проект районлаште илыше-шамычлан театр деке лишемаш полша.

Вончо эҥер гоч кӱварым тӧрлымӧ паша у этапыш куснен. Морко районышто пашам «Инфраструктура для жизни» нацпроект дене ыштат. Тачысе кечын искусственный сооружений 15% ямде. Подрядный организаций кӱварын негыз меҥгылаштыже пашам шукта. Специалист-влак ригельым бетонироватлат. Тӧрлымӧ пашам шуктымо жапыште тиде верыште транспортлан реверсивный движений. Верысе калыкым да уна-влакым тидым шотыш налаш темлат. Каласен кодаш лиеш, Звенигово-Шелангер-Морко корнышто вич кӱвар уло. Нылытыштыже пашам ты марте шуктеныт. Вончо эҥер гоч кӱварыште ыштыме паша тиде могырышто чыла искусственный сооружений-влакым нормативлан келыштара.

Йошкар-Олан историй тоштерыштыже марий чодыран легендыже дене палыме лияш йӧн уло. «Легенды и сказки марийского леса» кидпаша выставке мастар-влакын пашашт дене палдара. Тушто 50 наре пашам ончыктат. Экспозиций марий калыкын фольклор да тӱвыра поянлыкшылан пӧлеклатеш. Толшо-влак керамике, тыгак тӱр, флорист композиций дене палыме лийын кертыт. Тыгак сувенир-влакым ужаш лиеш. Выставке 28 февральыште почылтеш да 25 март марте пашам ышта.

"Писатель да жап" программыште Р.А. Кудрявцеван усталыкше да шымлымаш пашаже-влак нерген Н.А. Федосеева дене мутланенна. Передачым Марина Глушкова ямдылен.

Таче Руэм школышто ача-ава да туныктышо-влакын «Ребенок в современном мире» регион-влак кокласе форум эртаралтеш. Тудо нылымше гана лиеш. Туныктышо да ача-ава-влак воспитаний да туныктымаш шотышто йодыш-влаклан вашмутым кычалаш тӱҥалыт. Форумын программыштыже – пленарный заседаний, тыгак ятыр тематике секций, мастарлык класс-влак лийыт. Уна-влак Москва, Санкт-Петербург, Саратовский область, Башкортостан Республике гыч толыт. (📸 Республикысе Туныктыш министерствын тÿшкаже гыч налме)

Утарыше-влак ий кӱжгытым висат. Йошкар-Олаште «Форум» рӱдер воктене Изи Какшаныште ик кӱжгыт 38 сантиметр, Воскресенский кӱвар тураште – 40 сантиметр марте. Юл эҥерыште Кокшайскыште 40-45 сантиметр, тыгодым ий пушкыдемаш тӱҥалын, , ий умбалне 15-20 сантиметр лум. Волжскышто ий кӱжгыт 35-40 сантиметр, Козьмодемьянскыште 20-23 сантиметр марте, тыгодым верын-верын кок лончан ий лияш тӱҥалын. Юрино поселко воктене ий лум йӧршан, тудо 35-40 сантиметр кӱжгытан, Звенигово затонышто 45 сантиметр марте. Южо вере ий шемемаш тӱҥалын, палдарат утарыше-влак. Тидын годым еҥ-влаклан лӱдыкшыдымылык правилым эскераш темлат, ий ӱмбаке лекман огыл.

"Историй пӧрдемыште" Сергей Константинович Свечников Царевококшайскым негызлыме нерген оҥай факт-влак дене палдарен. Передачым Володя Матвеев вӱден.

26 февральыште Медведево район Пӱкшерме фольклор пӧртыштӧ йоча Ӱярня пайрем эртен. Тудым Республикысе Марий тӱвыра рӱдер эртарен. Пайремыш кундемысе вич школ гыч тунемше-влак толыныт. Тиде Йошкар-Ола, Морко район Волаксола, Медведево район Шойбулак да Параньга районысо Кугу Пумарий. Йоча-влак йулам ончыктеныт, Ӱярня чесым конденыт. Тиде пайрем йоча-влакым марий йӱла деке кумылаҥдаш, тӱвыра ойыртем дене палдараш эртаралтеш. Йоча Ӱярняште икымше верыш Параньга район Кугу Пумарий школ гыч тунемше-влак сенышыш лектыныт. Республикысе Марий тӱвыра рӱдер Йоча Ӱярня пайремым икмыняр ий, тӱрлӧ кундемыште эртара. Кодшо ийын тудо Йошкар-Олаште лйиын.

Караоке кас у форматыште🙂 А те колыштында? Тыгай формат келшен? 👇Шонымашдам вучена

Республикыште калыкым шижтарыме системым тергат. Марий Эл Правительстве Председатальын алмаштышыже Степан Воронцовын распоряженийже дене келшышын тудо 4 мартыште республикыште эртаралтеш. 10 шагатат 40 минут гыч 10 шагатат 47 минут марте комплексный тергымаш лиеш. Тудын годым калыкым шижтарыме системым тӱрыс тергат. Тыгодым электрон сирене, акустический системе, кугу йӱкын ойлышо устройство-влакым тергат, радио да телеэфирым кӱрлын, системын ямде улмыжо шотышто увер йоҥгаш тӱҥалеш.Калыклан шижтарат, тиде – системым тергымаш. Еҥ-влаклан нимогай действийым ыштыман огыл.